تعتقد ان الزمن يمنعني ويحرمني من شوفته مثل ماحرمني من وجوده بحياتي
(ليه يازمن انا بدنيتي ايش سويت )
على (كف الكفن)تنبض بقايا روح مجروحه..خذاها الوقت والعبره تسوق عيون مشتاقه
تراقب وش بعد بكره وش اللي يتبع جروحه..وش اللي يجبر الخاطر وقلبي عايش فراقه
ثلاث شهور وهمومي تعانق لهفتي بنوحه..وانا والصمت والذكرى نقلب ماضي اوراقه
ادور بالسماء طيفه واردد وينها روحه..ولا غير الصدى اسمع يردد صوتى بآفاقه
عقب ماهو وسط روحي يباهي شامخ صروحه..غدا كنه حلم ليله حدوده لمعه اشراقه
خياله مابقى غيره يبروز باقي اللوحه..وينثر في ملامحها من طعون الجفاء باقه
ويتركها تخاويني طريق دموع مسفوحه..طريق يجرح الخافق ويقتل فرحه أعماقه
عليه أسير وأساير زمان أرواح مذبوحه..نزفها الصد من دمي وهمي زادها اغراقه
ألملمها مع الحسره أخاف عيون مشفوحه..وتفضحني معاناتي و(الذكرى)زاهي أشواقه
تبين ولو نفي قلبي عليها رسوم مفضوحه..مواريها (دمع عيني)ظلاله بان بأحداقه
رسمها والسبب خيبه تجر أحلام مطروحه..تمايل حضنها وهلت سنين تظمي ارماقه
ظمتني والعطش حقق مع الايام مصلوحه..وانا الهاجوس يلعب بي من اللي للوصل عاقه
سؤال يدور في ذهني جوابه رافض يبوحه..ولآبه بالهوى (غيبه)من الأبواب للطاقه
أخاف الشمس من جوه لجو الغير ممنوحه..شعاعه بالفضاء يملى لغيري نجوم براقه
(سراب)كلما جيته يودع عالم وضوحه..مع الأطلال يسكني وأموت بحرقه اشهاقه
وأعود أجدد أكفاني بنبض عروق مجروحه..واكف بداخلي عبرة تسوق عيون مشتاقه